Joornaaliistaha caanka ah Piers Morgan ayaa aaminsan in BBC ay xushmad darro xun u muujisay Qatar ka dib markii ay baahin waayeen xafladii lala dhacay ee furitaanka Koobka Adduunka.
Ka hor kulankii fuirtaanka ee Al Bayt Stadium, fanaanka Jung Kook oo ka tirsan koox faneedka reer South Korea ee BTS iyo fanaanka reer Qatar Fahal Al Kubaisi ayaa ka soo heesay xaflada furitaanka.
Aktarka Mareykanka ee Morgan Freeman ayaa sidoo kale daadihiye ka ahaa si la mid ah hindisaaga reer Qatar Ghanin Al Muftah oo ah ambasadoorka Koobka Adduunka oo ku dhashay naafonimo.
Laakiin daawadayaasha TV-ga BBC ayaa awoodi waayay inay daawadaan xaflada furitaanka iyadoo BBC aysan xitaa hal muuqaal oo dabaaldega furitaanka ah ka baahinin TV-geeda.
Bedelkii ay xaflada furitaanka baahin lahaayeen, Gary Lineker oo ah soo jeediyaha BBC ee Koobka Adduunka ayaa wuxuu muddo daqiiqado ah cambaareynayay dalka martigelinaya ee Qatar.
Taageerayaasha kubada cagta ee UK ayaa cabasho ka gudbiyay BBC, waxaa isna sidoo kale cambaareeyay falka BBC ay ku kacday joornaaliistaha Piers Morgan.
Wuxuu Twitter soo qoray: “Waa xushmad darro aad u xun oo loo muujiyay Qatar in BBC ay baahin weyso xafladii furitaanka ee Koobka Adduunka, taas bedelkeeda waxay ka hadlayeen sida Koobka Adduunka u xun yahay.
“Haddii ay sidaas uga xun yihiin Koobka Adduunka, waa inay dalka ku soo celiyaan ciidanka shaqaalaha ah ee ay u direen Koobka Adduunka islamarkaana ay naga qarsadaan labada wajiilenimada.”
Morgan Piers ayaa sidoo kale u jawaabay qof u soo qoray: “Maalin walba oo isbuuca ka mid ah ayaan xushmad dareynayaa Qatar” isagoo yiri: “Waad sameyn kartaa wixii aad doonto laakiin anigana kuma qasbani inaan bixiyo lacagta leysanska si aad xushmad darradaada u soo bandhigto.”
Morgan ayaa ula jeeda hadalkiisaas in dadka Ingariiska ay bixiyaan leysan TV oo ay siiyaan BBC madaama ay tahay warbaahin qaran.
