Cristiano Ronaldo ayaa ah kabtanka hoggaamin doona shaxda isku dhafka ah ee kooxaha Al Nassr iyo Al Hilal kaga hortagayaan Paris Saint-Germain kulanka saaxiibtinimo ee ay Khamiista ballansan yihiin.
Wuxuu noqonayaa kulankii koowaad tan iyo markii uu Ronaldo ku biiray kooxda Al Nassr oo sanadkii mushahar dhan 175 Milyan oo pound siinaysa.
Baraha bulshada ayaa lagu baahiyay muuqaalka Cristiano oo guddoomaya calaamada kabtanimo maalmo kahor kulanka Paris.
Turki Al Sheikh oo ah madaxa madadaalada guud ahaan dalka Sucuudiga ayaa baahiyay muuqaalka uu ku xaqiijinayo inuu Ronaldo yahay kabtanka kooxaha dalkiisa hoggaaminaya ciyaartaas.
Kulankiisa koowaad ayaa noqon doona mid ay iskaga hor yimaadaan ciyaaryahanka ay mudada dheer soo loolamayeen ee Lionel Messi.
Kulankan ayaa noqon kara midkii ugu dambeeyay ee ay Messi iyo Ronaldo oo wadajir 12 Ballon d’Or ugu soo guuleystay kulmi karaan.
Messi iyo Ronaldo ayuu xifaaltan cajiib ahi kusoo dhex maray kooxaha Barcelona iyo Real Madrid, kabtanka Portugal ayaa Bernabeu ka hayaamay 2018 halka kabtanka Argentina ka tagay Barca 2021.
