Kooxda Real Madrid ayaa mid kamida xiddigaha joogtada ka ah shaxdeeda asaasiga ah u muujisay sida ay uga maarmi karto, ciyaaryahankaas ayaa ah daafaca bidix ee Ferland Mendy.
Mendy ayaa Real Madrid kaga soo biiray dhinaca kooxda Lyon oo uu 53 Milyan oo euro kaga yimid xagaagii 2019, tan iyo wakhtigaas ayuu in ka badan 100 kulan usoo saftay Madrid isagoo xilli ciyaareedkan markale isku muujiyay xulashada macalin Carlo Ancelotti.
Marka laga yimaado inuu wali shaxda muhiim ka yahay ayuu haddana wargeyska Fichajes sheegayaa in Los Blancos u furantahay inuu kooxdeeda ka tago.
Warbixinta ayaa sababta ku sheegtay in Real Madrid ay doonayso inay ka samayso lacag ay kor ugu qaado dalabka ay ka gudbinayso daafaca dhexe ee RB Leipzig iyo xulka Croatia ee Josko Gvardiol.
Heshiiska uu Ferland ku joogo Estadio Santiago Bernabeu ayaa ah mid ku eeg ilaa 2025 taas oo ka dhigan inay Madrid joogto boos ay lacag fiican iibkiisa kaga samayn karto.
Mendy ayaa haatan daafaca bidix kulamada la fadhiisiyo la dheelsiiyaa David Alaba oo daafac dhexe ah balse marka hore doorka daafaca bidix ka ciyaari jiray.
