Jurgen Klopp ayaa magacaabay laba ciyaartoy oo lama filaan ah oo Arsenal sabab ugu noqonaya inay ku guuleysato horyaalka Premier League, isla markaana kooxdiisa Liverpool uu ku dhaco niyad-jab weyn oo u dhoweynaya inay faro-madhnaan ku sagootiyaan xilli-ciyaareedkan.
Tababaraha Liverpool oo warbaahinta la hadlay kaddib guul-darradii 2-0 ahayd ee ay kala kulmeen Everton Arbacadii, taas oo sabab u noqotay in ay kooxdiisu ay guus ka istaagto horyaalka Premier League maadaama ay saddex dhibcood ka hoosayso Arsenal oo hoggaanka haysa, sidoo kalena ay hal dhibic ka sarreeyaan Man City oo laba ciyaarood baaqi u yihiin.
Jurgen Klopp oo dhamaadka xilli-ciyaareedkan ka tegaya Liverpool oo uu muddo sagaal sannadood ah joogay ayaa markii ay kooxdiisu guul-darraysatay kulankii Everton waxa uu hor yimid warbaahinta waxaana uu sharraxay farqiga u dhexeeya Liverpool iyo Arsenal isaga oo ammaan kula dul-dhacay labada difaac dhexe ee Arsenal ee William Saliba iyo Gabriel Magalhaes.
Klopp ayaa yidhi: “Ciyaartoyda dheeshay kulamada oo dhan ma aha kuwo firfircoon, laakiin kooxaha kalena waa nala mid. Ma doonayo in aan arrintan u isticmaalo cudur-daar, mar haddii ay wiilashu taam yihiin oo aanay dhaawacnayn.
“Laakiin waa in aan sheego, in Gabriel iyo William Saliba ay Arsenal u ciyaareen kulamada oo dhan. Miyey naga ciyaaro yaraayeen? Anigu ma hubo laakiin waxa ay dheeleen kulamo badan.”
Klopp ayaa waxa uu sheegay inuu ku qasbanaaday inuu Jayden Danns kusoo daro liiska kooxdiisa markii uu ka dhaawacmay Diogo Jota sidoo kalena uu ka maqnaaday Cody Gakpo oo ay xaaskiisu umulaysay.
