Kooxda kubadda cagta Liverpool ayaa qarka u saaran saxeexa xiddiga reer Netherlands ee Cody Gakpo oo maanta ay dalab rasmi ah ka gudbisay, waxaana hadda socda wada-hadallo heerkoodu sarreeyo oo lagu soo gunaanadayo heshiiska ay Liverpoolkula soo wareegayso gool-dhaliyahan.
Liverpool ayaa gudbisay dalab xambaarsan £50 milyan oo Gini oo dhawr waji lagu kala bixinayo, waxaana ku qanacday PSV Eindhoven oo markiiba la xidhiidhay ciyaartoygii ay ku beddeli lahaayeen Gakpo oo bisha January kasoo degi doona Anfield.
Labada kooxood ee Liverpool iyo PSV Eindhoven ayaa heshiiska iibka Cody Gakpo kala saxeexday daqiiqado ka hor, waxaana uu 23 jirkani maalmaha soo socda u duuli doonaa Ingiriiska oo uu tijaabada caafimaadka ugu mari doono Liverpool.
Jurgen Klopp oo kooxdiisu ay la dhibaatoonayso dhaawacyo tiro badan, isla markaana ay ka maqan yihiin saddexda afka hore ee Luis Diaz, Roberto Firmino iyo Diogo Jota ayaa waxay u shubi doontaa PSV Eindhoven £37 milyan oo Gini oo hadda la bixinayo iyo £13 milyan oo Gini oo kale oo ku xidhnaan doona bandhigga iyo guulaha uu laacibkani la gaadho Reds.
Manchester United oo hore u doonaysay Gakpo oo uu isaguna aqbalay bishii August ayay PSV Eindhoven u diidday sababo la xidhiidha dhinaca lacagta iyo in ay waqtigaas doonayeen inay sii haystaan si ay horyaalka ugula tartamaan Ajax, hase yeeshee bisha January ayay hadda aqbaleen in ay ka iibiyaan Liverpool.
Cody Gakpo to Liverpool, here we go! The deal has been signed between the two clubs 🚨🔴 #LFC
Gakpo will travel to England in the next days to undergo medical tests and then sign the contract. pic.twitter.com/tmWJh68WQV
— Fabrizio Romano (@FabrizioRomano) December 26, 2022
Wariyaha ciyaaraha ee Fabrizio Romano ayaa xaqiijiyey in aanay marnaba Manchester United dalab rasmi ah ka gudbin Gakpo, wax kasta oo ku saabsan laacibkanna uu ahaa xiise ay Red Devils u muujinaysay.
