Horyaalka waddanka Ingiriiska ee Premier League ayaa shaaciyey in uu isbeddel ku sameeyo waqtiga la ciyaarayo kulanka adag ee horyaalka Premier League ee Arsenal iyo Newcaste United, kaas oo jamaahiirta lagu wargeliyey in aanay ku xisaabtamin waqtiga tigidhada ay hore u goosteen oo ay garoonka yimaaddaan xilliga dambe ee la cayimay.
Jamaahiirta Arsenal ayay lama-filaan ku noqotay waqtiga uu Premier League u go’aamiyey kulankooda Newcastle United oo waqtigii hore loogu qorsheeyey uu ahaa 12:30pm, laakiin hadda loo riixay 8pm waqtiga UK oo noqonaysa 11ka fiidnimo saacadda Geeska Afrika.
Finalka Carabao Cup ee Axadda ee Chelsea vs Liverpool ayaa ku keenay Premier League inay isbeddel ku sameeyaan kulamadooda, waxaana inta badan ciyaaraha la dheeli lahaa maalinta Axadda loosoo qaddimay maalinta Sabtida, halka Tottenham vs Luton dib loogu dhigay Arbacada iyadoo kulanka kaliya ee Premier League ee la ciyaari doono Axaddu uu noqonayo Wolves vs Sheffield United.
Ciyaarta Arsenal vs Newcastle United oo uu baahinayo telefishanka TNT Sports ee hore loo odhan jiray PT Sports ayaa saamaynta ugu badan ay ku noqotay ciyaarta finalka Carabao Cup, halka kulanka Sky Sports uu baahinayo ee Man City vs Bournemouth laga dhigay isla Sabtida oo ay 8:30pm waqtiga Geeska Afrika bilaabmi doonto.
