Halyeyga Brazil ee Ronaldo Nazario ayaa magacaabay tababaraha uu la doonaayo in loo dhiibo oo uu layliyo xulka qaranka dalkiisa ee uu toddobaadkan horraantiisii iska casilay Tite, kaddib markii ay wareegga siddeedda kaga hadheen Koobka Adduunka.
Tite oo ahaa tababaraha Brazil lix sannadood iyo badh ayaa ka dhabeeyey ballantiisii ahayd inuu ka tegayo shaqada marka uu dhamaado Koobka Adduunku, waxaana hadda uu xidhiidhka kubadda cagta Brazil raadinayaa tababare khibrad iyo sumcad leh.
Ronaldo oo ka mid ahaa xiddigihii xulka Brazil u qaaday Koobkii Adduunka 2002, ayaa waxa rikoodheyaal kaga badisay Croatia, waxaanay taasi soo afjartay filashadii ahayd in ay 20 sannadood kaddib ku guuleystaan koobka.
R9 ayaa rumaysan in loo baahan yahay in xulka loo dhiibo tababare ajaanib ah oo aan u dhalanin Brazil, waxaana uu miiska soo dhigay dhawr tababare oo khibrad badan oo reer Yurub.
Warbaahinta ayaa maanta tabinaysay in xidhiidhka kubadda cagta Brazil doonayo Pep Guardiola, laakiin Ronaldo wuu kaga aragti duwan yahay, waxaana uu usoo jeediyey in ay xulka u dhiibaan Jose Mourinho, waxaanu yidhi: “Waxa jira magacyo badan oo cajiib ah oo ku fiicnaan lahaa xulka Brazil. Carlo Ancelotti, Abel Ferreira oo ah tababaraha Palmeiras, Jose Mourinho oo ah macallinka Roma iyo kuwo kale.
“Waa tababareyaal cajiib ah, dhamaantoodna qandaraasyo ayay ku jiraan. Ma garanayo waxa uu xidhiidhka Brazil samayn doono, laakiin anigu fikir ahaan waxa aan taageereyaasha macalin ajaanib ah.
“Iima muuqdaan dookhyo badan oo reer Brazil. Waxa aan odhan lahaa Fernando Diniz [tababaraha Fluminense] ayaa ka mid ah magacyada Btababareyaasha reer Brazil ee aan jecelahay, laakiin ka hor inta aanay CBF shaacin magacyadooda, waa inay eegaan dookyada.”
Ronaldo Nazario ayaa waxa uu xusay in Jose Mourinho loo dhiibo xulka Brazil, waxaana isaga oo sababaynaya uu yidhi: “Tan iyo 2002 xulku waxba kuma guuleysanin, waxa la joogaa waqtigii ku habboonaa ee la qaadan lahaa khatarta iyo ikhtiraaca, wax cusubna la keeni lahaa xulka.
“Anigu wax dhibaato ah uma arko haddii shaqada loo dhiibo tababare aan reer Brazil ahayn, waliba waan taageereyaasha. Go’aanka waxa iska leh CBF balse waxa aan rajaynayaa in uu noqdo Jose Mourinho.”
