Gabadh uu dhalay Andre Ayew oo todoba sanno jir ah ayaa suuxday islamarkaana cusbitaal loola cararay ka dib markii aabaheed uu rigoore ka qasaariyay Ghana kulankii ay shalay la ciyaareen Uruguay.
Wararka Ghana ka imaanaya ayaa sheegaya in gabadha ay suuxday islamarkaana loo qaaday cusbitaal ku yaala dalka Qatar.
Waxaa la sheegay haatan in xaaladeeda ay fiican tahay oo ay iska ciyaareyso.
Waana sabbatii si lama filaan ah loogu bedelay Andre Ayew waqtigii nasashada ee kulankii shalay.
Ayew ayaa rigoore qasaariyay bilowgii ciyaarta markaasoo ciyaarta ay aheyd barbaro goolal la’aan ah.
Ghana ayaa 2-0 looga badiyay waxayna ka hareen Koobka Adduunka iyagoo sidoo kale la degay Uruguay oo gool seddexaad u baahneyd.
Xulka Ghana waxay u baahnaayeen kaliya barbaro si ay ugu soo gudbaan wareega 16ka Koobka Aduunka laakiin waxaa lagu garaacay labo gool uu ka dhaliyay Giorgian de Arrascaeta.
Waxaa guruubkooda H ka soo baxay xulka Portugal oo wareega 16ka la ciyaaraya Switzerland iyo South Korea oo kaalinta labaad ku soo baxday islamarkaana la ciyaareyso Brazil.
