Xidhiidhka kubadda cagta Portugal ayaa si rasmi ah u shaaciyey in Roberto Martinez loo magacaabay xulka qaranka dalkaas, bil kaddib markii uu Martinez iska casilay Belgium oo uu lixdii sannadood ee ugu dambeeyey soo laylinayay.
Xulka Portugal ayaa shaqada ka caydhiyey Fernando Santos bishii hore markii ay Morocco wareegga siddeedda kaga reebtay Koobka Adduunka ee lagu qabtay Qatar, halka Roberto Martinez uu is-casilay markii uu xulka Belgium wareeggii koowaad ee group-yada ku hadhay.
Bil gudaheed ayaa tababarahan hore ee Everton uu iskaga gudbay laba xul oo waaweyn oo reer Yurub ah, waxaana markii lagu dhawaqay inuu yahay tababaraha xulka Portugal uu la hadlay saxaafadda, isaga oo yidhi: “Aad ayaan ugu faraxsanahay in aan halan joogo oo aan noqdo tababaraha xulka Portugal. Markii ugu horreysay ee aan la hadlay madaxweynaha xidhiidhka, waxa aan ogaaday in uu mashruucan ciyaareed yahay mid aan ku farxayo.
“Waan fahamsanahay inay jiraan filashooyin waaweyn iyo ujeeddooyin waweyn, laakiin waxa joogta koox wanaagsan oo ay dad fiican ku jiraan,aniguna waan ku faraxsanahay, waannan rajaynayaa in aan gaadhi doono ujeeddadaas.”
Sannadkii 2016 ayaa Roberto Martinez uu noqday tababaraha xulka Belgium kaddib saddex sannadood oo uu isku muujiyey oo uu layliyey Everton.
Koobkii Adduunka ee 2018 ayuu xulka belgium geeyey semi-finalka, waxaana reebay Faransiiska oo koobkaas ku guuleystay, halka Euro 2021 uu Talyaanigu reebay.
