Tababaraha reer Spain ee Pep Guardiola ayaa magacaabay xiddig ka tirsan Real Madrid oo uu ogsoon yahay in uu saamayn weyn ku leeyahay Santiago Bernbeu, kaas oo ay kooxdiisu taxadar badan ka samayn doonto marka ay labada kooxood iska hor yimaaddaan wareegga siddeedda Champions League.
Manchester City iyo Real Madrid ayaa sannadkii saddexaad oo xidhiidh ah isku dhacay, waxaana labadii hore ay ahaayeen wareegga semi-finalka oo ay koox walba halmar adkaatay, isla markaana ku guuleysatay koobka Champions League, halka sannadkanna la sugayo natiijada ay ku kala bixi doonaan.
Pep Guardiola oo ay saxaafaddu wax ka weydiisay Real Madrid iyo ciyaartoydeeda ayaa waxa uu qiray in joojinta Jude Bellingham ay dhibaato ku noqon doonto kooxdiisa, waxaanu yidhi: “Jude Bellingham way muuqataa saamayntiisu. Hadda Real Madrid waa koox ka duwan sidii sannadkii hore. Saamayntiisu way caddahay, sidaa daraadeedna waa in aanu isku dayno in aanu helno sidii aanu isaga u joojin lahayn.”
Guardiola ayaa sidoo kale ciyaar maskaxeed lasii dheelay Real Madrid oo xilli-ciyaareedkii hore ay si xun u garaaceen, waxaana uu yidhi: “In aad ka hor tagto Real Madrid waa arrin adag, mana jirto cid dafiri karaysa taas. Waa koox cajiib ah, tartankanna khibraddooda ayay ku maamuli karaan waxyaabo badan.”
