Dimitar Berbatov ayaa soo saaray saadaashiisa kulamada horyaalka Premier League ee toddobaadka, iyadoo ay ballansan yihiin naadiyo waaweyn oo natiijooyinkoodu ay saamayn dhab ah ku samayn doonaan miiska kala-sarraynta kooxaha.
Ciyaarta sida weyn isha loogu hayo ee uu xafiiltankeedu sii bilowday, isla markaana tababareyaashu warbaahinta isku weerareen waa Manchester City iyo Everton oo garoonka Goodison Park ku dagaallami doonta.
Tababaraha Everton ee Sean Dyche ayaa weeraray Manchester City shirkiisii jaraa’id ee ka hor ciyaartan, waxaanu sheegay in sharcigu aanu u sinnayn labadooda kooxood oo Man City lala saayiro iyadoo lacago badan kharash garanaysa, halka kooxdiisa Everton laga jaray toban dhibcood, haddana ay baadhitaanno kale ku socdaan.
Pep Guardiola oo u jawaabay ayaase difaacay kooxdiisa isla markaana duray Sean Dyche, waxaana uu hadalkoodani cirka kusii shareerayaa xamaasadda ciyaartooda.
Waxa kale oo ballansan Arsenal iyo West Ham oo ka wada dhisan magaalada London, halka Liverpool ay u dagaallami doonto inay kusoo laabato jidka guusha marka ay Sabtida kulmaan Burnley kaddib guul-darradii Arsenal.
Dimitar Berbatov oo saadaaliyey kulamadan, ayaa waxa uu sheegay in Man City ay hoggaanka si ku-meelgaadh ah ula wareegi doonto Sabtida oo ay 3-1 kusoo garaaci doonto Everton, laakiin ay Liverpool u jawaabi doonto oo ay saddex dhibcood kasoo xoogi doonto Burnley oo ugu tegaysa Anfield, sidaasna ay dib ugu soo ceshan doonto hoggaanka.
Haddii ay saadaasha Dimitar Berbatov rumowdo, waxay ka dhigan tahay in saacado gudahood ay laba kooxood iska beddeli doonaan hoggaanka horyaalka Premier League.
Arsenal ayaa iyaduna sii wadan doonta guusha oo maalinta Axadda kasoo adkaan doonta West Ham, balse waxa uu Dimitar Berbatov saadaal murugo leh siiyey Chelsea oo uu sheegay inay guul-darro xanuun badan kala soo kulmi doonaan Crystal Palace, halka Manchester United ay barbarro la geli doonto Aston Villa.
Dimitar Berbatov waxa kale oo uu ka yaabiyey Newcastle oo uu u sheegay inay khasaare kala soo laaban doonaan safarkooda Nottingham Forest.
Saadaasha Dimitar Berbatov ee kulamada Premier League ee usbuucan
Man City 3-0 Everton
Fulham 2-1 Bournemouth
Luton 3-1 Sheffield United
Liverpool 3-0 Burnley
Tottenham 3-1 Brighton
Wolves 1-1 Brentford
Nottingham Forest 2-1 Newcastle
West Ham 1-2 Arsenal
Aston Villa 2-2 Man United
Crystal Palace 2-1 Chelsea
