Weeraryahanka Barcelona Robert Lewandowski ayaa u magacaabay xiddiga khadka dhexe ee Real Madrid Jude Bellingham iyo laacibka Paris Saint-Germain inay yihiin labada xiddig ee haatan ugu fiican dunida kubada cagta.
Wareysi uu siiyay jariirada Jarmalka ee BILD, Lewandowski ayaa la weydiiyay inuu magacaabo xiddiga haatan ugu fiican dunida, wuxuuna sheegay inay adag tahay in haatan la qiimeeyo madaama wax badan ay ka harsan yihiin xilli ciyaareedka balse wuxuu magacaabay Bellingham iyo Mbappe.
Waxa uu yiri: “Way adag tahay in la sheego sababtoo ah waxaa weli harsan koobka Qaramada Yurub iyo sidoo kale kulamadii ugu muhiimsanaa ee Champions League. Laakiin waqti xaadirkaan Jude Bellingham iyo Kylian Mbappe ayaa ah labada xiddig ee dunida ugu fiican.”
Bellingham ayaa dhawaan shabaqa ka soo taabtay Barcelona kulankii El Clasico isagoo dhaliyay goolka guusha waqtigii dhimashada ciyaarta halka Kylian Mbappe uu sidoo kale labo gool ka dhaliyay Barcelona kulankii Champions League ee ay PSG sameysay soo laabashada.
Real Madrid waxay wareega afar dhamaadka Champions League la ciyaareyso Lewandowski kooxdiisa hore ee Bayern Munich iyadoo lugta hore la ciyaarayo maalinta Talaadada ee 30ka bisha April.
Paris Saint-Germain ayaa iyadana semi-finalka Champions League waxay la ciyaareysaa kooxda Jarmalka ee Borussia Dortmund oo uu Lewandowski sidoo kale u soo ciyaaray iyadoo lugta hore la dheelayo Arbacada 1da bisha Maajo.
