Kooxda kubadda cagta Liverpool ayaa barbarro niyad-jab ah la gashay Manchester United oo ay ku booqatay Old Trafford, waxaanay hoggaanka horyaalka u hannaysay Arsenal oo si buuxda ugu fadhiisatay halka Jurgen Klopp ay kooxdiisu kaalinta labaad usoo dhacday.
Ciyaar ay Liverpool iska lumisay fursadihii ugu badnaa ee la diiwaangeliyo ee aanay ka faa’iidaysanin ayaa waxa ay ogolaatay in ay laba dhibcood ku lumiso Old Trafford, taas oo ka dhigan in labadii ciyaarood ee Manchester United ee xilli-ciyaareedkan ay lumisay afar dhibcood oo mid walba ay barbarro la galeen, halka sidoo kalena ay United ka reebtay tartanka FA Cup.
Manchester United ayaa waqti hore ka naxsatay Liverpool oo daqiiqaddii labaad oo aan dhammaanin uu gool u dhaliyey Alejandro Garnacho, hase yeeshee waa laga diiday goolkaas iyadoo lagu qaaday inuu offisde ku jiray.
Nasiibka ayaa mar kale caawiyey Liverpool oo iyagoo guul-darro isku qoray waqti ay dhamaadka ciyaartu uu dhamaad kusii dhowaa la siiyey rikoodhe diciif ahaa oo ay dood ka taagan tahay oo sabab u noqday inay dhibco ahaan la sinnaadaan Arsenal.
Daqiiqaddii 23aad ayaa Liverpool ay hoggaanka ciyaarta la wareegtay markaas oo uu gool qurux badan u dhaliyey Luis Diaz kaddib fursado dhawr ahaa oo ay isaga iyo xiddigaha kooxdiisu khasaariyeen.
Mohamed Salah ayaa laba jeer goolka hortiisa ka helay kubbado uu ku toogtay goolka balse uu dallacay halka mid kalena uu ku beegay goolahayaha oo laga badbaadiyey.
Dominik Szozboszlai iyo Darwin Nunez ayaa sidoo kale lumiyey kubbado goolal loo ka hor intii aan waqtiga nasashada loo bixin, waxaanay labada kooxood ku kala nasteen iyadoo Liverpool hoggaanka ku haysa 1-0.
Laakiin markii lagu soo noqday qaybta labaad ayaa uu isbeddel badan ku yimid Manchester United oo ay la wareegeen khadka dhexe iyagoo go’doon ka dhigay weeraryahannada Liverpool ee Mohamed Salah, Darwin Nunez iyo Luis Diaz oo ay ku qasbeen inay dhinacyada isku badiyaan.
Shan daqiiqadood markii ay socotay qaybta labaad ayaa Jarell Quansah uu sameeyey qalad dilaa ah oo uu kubbad badhtamaha garoonka ugu dhiibay Bruno Fernandes iyadoo goolhaye Kelleher uu kasoo baxsanaa goolka, waxaana uu xiddiga reer Portugal ku toogtay goolka oo madhan oo uu shabaqa ku hubsaday.
Darwin Nunez ayaa goolka hortiisa loo dhigay kubbad dahabi ahayd oo uu si kasta u dhalin karayey, laakiin laacibka reer Uruguay ayaa halkii uu dhinaca goolka u laadi lahaa usoo celiyey xagga dambe isaga oo aan ku talo-gelin inuu baas bixiyo.
Daqiiqaddii 67aad ayaa Kobbie Mainoo uu gool qurux badan oo uu kubadda soo wareejiyey ku aamusiiyey Liverpool isaga oo ciyaarta ka dhigay 2-1. Laacibkan reer England ee carruurta ah ayaa xerada ganaaxa ku helay baas uga yimid Aaron Wan-Bissaka, waxaana inta uu is-wareejiyey uu ku toogtay goolka oo uu cidhifka kale kubadda ka sudhay shabaqa.
Dhamaadka ciyaarta oo ay toddoba daqiiqadood ka hadhsan tahay ayaa Harvey Elliot uu lasoo galay kubbad xerada ganaaxa Manchester United waxaana qalad ku galay Aaron Wan-Bissaka iyadoo garsoore Anthony Taylor uu markiiba tilmaamay in la dhigo, waxaana ku taageertay VAR oo laga soo hubiyey.
Mohamed Salah ayaa kubadda sallaxday oo lugta bidix darbad xooggan ku toogtay isaga oo dhinaca qaldan u diray goolhaye Andre Onana oo bandhig fiican ka sameeyey ciyaartan.
Luis Diaz ayaa uu nasiibku diiday markii uu goolka hortiisa ka helay kubbad waqtigii dheeraadka ahaa oo ay afar daqiiqadood dhaceen, waxaana ka dallacantay kubadda oo uu ku leexiyey goolka.
Natiijadan ayaa ka dhigan, in Arsenal ay hoggaanka horyaalka si rasmi ah ula wareegtay oo ay ku hayso 61 dhibcood, waxaanay sagaal gool ka horreeyaan Liverpool oo ay isku dhibco yihiin halka Manchester City oo leh 71 dhibcood ay ku jirto kaalinta saddexaad.
