Luka Modric ayaa doonaya inuu sii joogo Real Madrid hal xilli ciyaareed kale, isagoo kubadiisa ku beeninaya dadka aaminsan inuu kooxda ka tagi doono 30ka Juun, sida ay qortay Marca.
Qaab ciyaareedkiisii kulamadii Manchester CIty iyo Barcelona ayaa soo bandhigay in Modric uu yahay ciyaaryahan aad uga fog inuu ciyaaraha ka fariisto waqti dhow.
Xidiga reer Croatia ayaa soo bandhigay ciyaarba ciyaarta ku xigta inuu yahay xiddig qeyrul caadi ah, waxaana haatan Real Madrid ka dhex bilaabatay dood ku saabsan mustaqbalka waayo aragaan,
Sida ay sheegtay Marca, inkastoo qof walba oo Real Madrid ka tirsan uu macsalaameyntiisa Modric diyaarsaday, hadana qaab ciyaareedkiisa iyo baahida uu u qabo inuu sii ciyaaro ayaa ka bedeleysa maanka dad badan.
Xaqiiqda ayaana ah inaan weli wax wadahadal ah laga yeelanin mustaqbalkiisa, taasoo la micno ah inay jirto suurtogalnimo weyn inuu xilli ciyaareed kale sii joogo kooxda.
Modric ayaa si lama filaan ah loogu soo bilaabay kulankii El Clasico, wuxuuna soo bandhigay qaab ciyaareed wanaagsan. Isagoo xiran kabtanka kooxda, Luka Modric ayaa ahaa wadnaha ay ku dhaqaaqeysay kooxda isagoo ka caawiyay inay garaacaan Barcelona oo ay xaqiijistaan horyaalka La Liga.
38 jirkaan ayaa weli soo bandhigaya inay wax ku harsan yihiin, waana sababta ay u jirto suurtogalnimada inuu xilli ciyaareed kale u dheelo Los Blancos.
