Kooxda kubadda cagta Liverpool ayaa dhamaystirtay heshiiska tababaraha cusub ee u beddelaya Jurgen Klopp oo Axadda ka tegi doona, kaddib sagaal sannadood oo uu joogay Anfield oo uu guulo badan gaadhsiiyey.
Liverpool ayaa lala xidhiidhinayey tababareyaal badan, laakiin waxa ay markii dambe u leexatay dhinaca tababaraha reer Netherlands ee Arne Slot oo ay la gaadheen heshiis maanta si rasmi ah loo xaqiijiyey.
Arnet Slot oo ay da’diisu tahay 45 jir ayaa beddeli doona Jurgen Klopp oo 56 jir ah oo isaguna sannadkii 2015 xilka kala wareegay Brendan Rodgers, balse bishii January ku dhawaaqay inuu tegayo dhamaadka xilli-ciyaareedka.
Tababare Arne Slot oo u dhashay waddanka Netherlands oo saxaafadda la hadlay ayaa xaqiijiyey in uu yahay tababaraha cusub ee Liverpool, waxaanu yidhi: “Waxa aan idiin xaqiijin karayaa, in aan noqonayo tababaraha cusub ee Liverpool ee xilli-ciyaareedka soo socda.”
Liverpool ayaa bixin doonta €13 milyan oo Euro oo ay u shubi doonto Feyenoord oo uu hadda tababare ka yahay Arne Slot.
