Jude Bellingham iyo asxaabtiisa Real Madrid ayaa lagu abaalmarin doonaa lacag badan haddii ay ku guuleystaan Champions League bisha soo socota.
Maalintii Sabtida Real Madrid waxay ku guuleysatay horyaalka La Liga ka dib markii ay 3-0 ku garaaceen Cadiz islamarkaana Barcelona ay guuldarro 4-2 ka soo gaartay Girona.
Kooxda Carlo Ancelotti ayaa laga badiyay kaliya hal kulan xilli ciyaareedkan, waxaana ka badisay Atletico Madrid bishii Seotember, halka aan laga badinin 28kii kulan ee ugu danbeeyay horyaalka.
Real Madrid waxay haatan joogtaa semi-finalka Champions League iyadoo lugtii hore oo Jarmalka ka dhacday ay ku soo dhamaatay barbaro 2-2 ah, lugta labaad waxay caawa ka dhici doontaa Santiago Bernabeu.
Haddii kooxda Real Madrid ay gaarto finalka islamarkaana ay ku guuleysato koobkeedii 15aad ee Champions League, markaas xiddigaha Real Madrid waxaa loo balanqaaday lacag abaalmarin ah.
Sida ay sheegayaan warbaahinta Isbaanishka, waxaa ciyaartoyda iyo shaqaalaha lagu abaalmarin doonaa lacag kor u dhaafeysa 5 milyan euro haddii ay isku qaadaan horyaalka La Liga iyo Champions League.
Lacagtaas abaalmarintaan ayaana dhiirogelin u ah ciyaartoyda inay ka takhalusaan labada kooxood ee Jarmalka ee ka hortaagan koobka Champions League.
Haddii Real Madrid ay ka soo gudubto caawa Bayern Munich, waxay finalka isku arki doonaa kooxda Borussia Dortmund oo xalay ka soo takhalustay PSG.
