Halyeyga Real Madrid ee Zinedine Zidane ayaa saadaaliyey semi-finalka tartanka Champions League ee Real Madrid iyo Bayern Munich ee Arbacada, waxaana uu si cad u sheegay in uu taageeri doono kooxdiisii hore ee Real Madrid oo uu doonayo inay tagto finalka isla markaana ku guuleysato koobkan markii 15aad.
Real Madrid ayaa Arbacada waxa ay garoonkeeda Santiago Bernabeu ku qaabbili doontaa Bayern Munich oo lugtii hore ee ka dhacday garoonka Allianz Arena ay kusoo kala baxeen barbarro 2-2 ah.
Kooxda tababare Carlo Ancelotti ayaan wax guul-darro ah la kulmin kulamada wareegyada isreeb-reebka tooska ah iyada oo garoonkeeda joogta afartii sannadood ee ugu dambeeyey, waxaana ay saadaaliyeyaashu sheegayaan inay guul ka gaadhi doonto Munich oo ay finalka la ciyaari doonto Borussia Dortmund ama Paris Saint-Germain.
Zinedine Zidane oo saddex Champions League oo xidhiidh ah u qaaday Real Madrid sannadihii 2016 illaa 2018, sidoo kalena isaga oo ciyaartoy ah u qaaday koobkan sannadkii 2002 iyo isaga oo tababare ku-xigeen ah sannadkii 2014, ayaa waxa uu sheegay inuu rumaysan yahay in kooxdiisa hore ay guuleysan doonto.
Zidane oo xalay la hadlayay Sky Germany ayaa yidhi: “Waxa aan rajaynayaa in ay Madrid guuleysan doonto, laakiin waa ciyaar adag oo kakan.”