YAA HABAARAY? Saddex Ciyaartoy Oo Xalay Ka Dhaawacmay Liverpool Oo Ay Hore Uga Maqnaayeen 9 Laacib

Tababare Jurgen Klopp ayaa xaqiijiyey in ay saddex ciyaartoy oo kale ka dhaawacmeen kooxdiisa intii ay socotay ciyaartii ay guul-darradu kasoo gaadhay ee Manchester United oo 4-3 ku garaacday Axaddii, kana reebtay tartanka FA Cup.

Klopp oo cadhaysan ayaa sheegay in markii ugu horreysay uu arkay kooxdiisa oo garoonka dhaxdiisa ku dhibaatoonaysa, isla markaana ay ka muuqato tamar la’aan, waxaana uu ku sababeeyey jadwalka cidhiidhiga ah iyo nasasho la’aanta ciyaartoyda kooxdiisa.

Liverpool ayaa waxa hore uga dhaacnaa oo aan qayb ka noqonin ciyaartii Manchester United xiddigaha kala ah Ibrahima Konate, Joel Matip, Alisson Becker, Diogo Jota, Trent Alexander-Arnold, Stefan Bajcetic, Curtis Jones, Thiago Alcantara iyo Ben Doak, kuwaas oo la filayo in ay kaddib ciyaaraha caalamiga ah soo noqon doonaan Trent Alexander-Arnold, Diogo Jota iyo Curtis Jones.