Tababaraha Liverpool, Arne Slot, ayaa muujiyay muhiimadda taageerayaasha Anfield ka hor kulanka lugta labaad ee wareega 16-ka Champions League ee ay la leeyihiin Paris Saint-Germain (PSG). Isagoo ka hadlayay kulanka, Slot wuxuu yiri: “Caawa, PSG lama ciyaarayaan kaliya Liverpool, waxay sidoo kale la ciyaarayaan Anfield iyo taageerayaasha.”
Liverpool ayaa hogaaminaysa ciyaarya kadib guushii ay ka gaareen PSG lugtii hore ee ka dhacday Parc des Princes, halkaas oo Harvey Elliott uu dhaliyay goolka kaliya ee ciyaarta. Inkasta oo PSG ay muujiyeen awood badan kulankaas, Slot wuxuu qiray in kooxdiisu ay u baahantahay inay soo bandhigto qaab ciyaareedkoodii ugu fiicnaa si ay uga gudbaan kooxda uu hogaamiyo Luis Enrique.
Slot ayaa sidoo kale tilmaamay in PSG ay tahay koox dhameystiran oo leh tayo sare, taas oo ka dhigeysa in Liverpool ay u baahantahay taageerada buuxda ee jamaahiirta Anfield si ay u gaaraan guul. Taageerayaasha Liverpool ayaa caan ku ah abuurista jawi cajiib ah oo cadaadis saaraya kooxaha soo booqda, waxaana Slot uu rajeynayaa in caawa ay markale muujiyaan taageeradooda.
Dhanka kale, PSG ayaa ku rajo weyn inay soo ceshato natiijada, iyagoo ku tiirsanaya khibradooda hore ee soo laabashada kulamada waaweyn. Kooxda Faransiiska ayaa horey u muujisay awood ay ku soo laabato, waxaana ay rajeynayaan inay markale sameeyaan mucjiso kale.
Kulankan ayaa noqon doona mid xiiso leh, iyadoo labada kooxoodba ay doonayaan inay u gudbaan wareega xiga ee tartanka. Taageerayaasha kubadda cagta ayaa sugaya kulan adag oo ka dhici doona Anfield, garoon caan ku ah soo saarista habeenno xusuus leh oo Champions League ah.
