Mikel Arteta ayaa Jimcihii xaqiijiyey, in Thomas Partey aanu ciyaari doonin kulanka adag ee kooxdiisa Arsenal ay Axadda kula ballansan tahay Liverpool garoonka Emirates Stadium, taas oo ka dhigan in ciyaartoy muhiim ah oo ay muddo sugayeen aanay heli doonin.
Gunners ayaa martigelin doonta Liverpool, waxaanay u baahan yihiin guul si ay ugu dhowaadaan hoggaanka shanta dhibcood lagaga hayo, haddii laga badiyana waxa laga horreyn doonaa siddeed dhibcood.
Khadka dhexe ee reer Ghana ee Partey oo tababarka kooxdiisa kusoo laabtay ayay waqti hore ku noqotay ciyaartani, waxaana Mikel Arteta uu yidhi: “Nasiib-darro, Thomas dibu-dhac ayaa ku yimid maalmo ka hor, markaa diyaar uma aha in kooxda lagu soo daro. Maalmo ha noqoto ama usbuucyo eh, Thomas waynu arki doonaa marka uu soo laabto, aniguna ma ihi dhakhtar sharrixi karaya jugta cusub ee soo gaadhay.”
Dhinaca kale, Arsenal waxa tababarka ugu soo laabtay Gabriel Jesus oo hore shaki loo gelinayay taam ahaanshihiisa ciyaartan kaddib dhaawac kasoo aadhay jilibka ciyaartii Nottingham Forest. Arteta ayaa tilmaamay in laacibka reer Brazil uu diyaar yahay, waxaanu yidhi: “Gabi tababarka wuu qaadanayay toddobaadka oo dhan, waanu ciyaari karayaa.”
Labada ciyaartoy ee Fabio Vieira iyo Jurrien Timber oo muddo dheer dhaawacyo u jiifay, ayaa wali aan taam ahayn, balse Vieira ayaa la filayaa inuu bishan kusoo laabto tababarka oo uu kooxdiisa caawiyo qaybta dambe ee xilli-ciyaareedka.
