Finalka Carabao Cup ayaa Axadda ay ku kala calaf-qaadi doonaan kooxaha Liverpool iyo Chelsea, sidoo kalena waxa la dheelayaa kulamadii 26aad ee horyaalka waddanka Ingiriiska ee Premier League oo ay kooxo waaweyn ballansan yihiin.
Liverpool ayaa waxa ay ku guuleysan kartaa koobkii koowaad ee afar koob oo ay u tartamayso xilli-ciyaareedkan, halka Chelsea ay ka sokow Carabao Cup ay kaliya ku guuleysan karayso FA Cup oo ay wareegiisa shanaad usoo gudubtay.
Khabiirka ciyaaraha BBC Sport ee Chris Sutton ayaa waxa uu libinta koobka siiyey Liverpool, inkasta oo uu xusay inay isla rafaadi doonaan labada kooxood oo 30 daqiiqadood oo dheeraad ah lagu darayo ciyaartan.
“Liverpool waxay garaacday Luton Arbacadii iyadoo shan isbeddel ku samaysay shaxdii ay Chelsea ku garaacday 31kii January, waxaanay igu noqon doontaa layaab haddii aanay ciyaartoydooda waaweyn taam u noqonin.” Ayuu yidhi Chris Sutton.
Waxa uu intaa ku daray: “Haddii aanay taam u noqonin ciyaartoydaasi, Chelsea ayaa helaysa fursad dhab ah.”
Intaas kaddib ayuu Sutton u galay saadaasha finalka Carabao Cup, waxaana uu guul 2-1 ah siiyey Liverpool oo goolkeeda guushu uu imanayo 30 daqiiqadood oo dheeraad ah oo lagu dari doono ciyaarta, sida ay sheegayso saadaashu.
Waxa kale oo uu Chris Sutton saadaaliyey kulanka sida aadka ah loo sugayo ee Arsenal vs Newcastle United ee Sabtida, waxaana uu saddexda dhibcood ugu sii bushaareeyey Arsenal, halka Manchester City uu u sheegay inay si fudud u garaaci doonto Bournemouth.
Manchester United oo la ciyaaraysa Fulham ayaa uu sidoo kale sheegayinay usoo dhowaan doonto kaalinta afraad oo ay soo garaaci doonto Fulham.
Saadaasha finalka Carabao Cup
Liverpool 2-1 Chelsea
Kulamada Premier League ee usbuuca 26aad
Sabti
Aston Villa 2-0 Nottingham Forest
Brighton 1-2 Everton
Crystal Palace 1-0 Burnley
Manchester United 2-1 Fulham
Bournemouth 1-3 Manchester City
Arsenal 2-1 Newcastle United
Axadda
Wolves 2-0 Sheffield United
West Ham 1-2 Brentford
