Kooxda kubadda cagta Real Madrid ayaa la sheegay, in ay heshiis shaqsi ah la gaadhay difaaca Baern Munich ee Alphonso Davies oo xagaaga ay Los Blancos doonayso inay ku xoojiso safkeeda.
Alphonso Davies oo qandaraaskiisa Bayern Munich ay ka hadhsan yihiin 18 bilood ayaa la sheegay, in uu go’aansaday inuu ku biiro Real Madrid isla markaana soo afjaro waqtigiisii Allianz Arena, ayaa waxa ay kulmeen Juni Calafat iyo Jose Angel Sanchez oo ah masuuliyiinta Real Madrid u qaabbilsan suuqa.
Sida uu ku warramayo wargeska The Athletic, Alphonso Davies ayaa ku wargeliyey masuuliyiinta Real Madrid in aanu kordhin doonin qandaraaskiisa Bayern Munich oo uu xagaaga uu doonayo inuu ka tago oo uu ku biiro Real Madrid.
Faahfaahin badan lagama bixinin heshiiska Alphonso Davies iyo Real Madrid, hase yeeshee Bayern Munich ayaa la sheegay in dhinaceeda ay qaadatay go’aan ah inay isku daydo inuu qandaraas cusub u saxeexo Alphonso Davies haddii uu diidana ay si rasmi ah u iibiso, maadaama uu sannad kali ahi ka hadhsanaanayo qandaraaskiisa oo ay ka baqayaan inuu si xor ah uga tago.
