Horyaalka waddanka Ingiriiska ee Premier League ayaa ku dhawaaqay tababarihii iyo ciyaartoygii ugu wanaagsanaa horyaalka bishii December ee dhamaadka sannadkii tegay, waxaana kala qaatay laba kooxo kala duwan kasoo jeeda.
Weeraryahanka kooxda Bourenmouth ee Dominic Solanke ayaa noqday xiddigii ugu fiicnaa bishii tagtay ee December horyaalka Premier League, kaddib markii uu dhaliyey lix gool, lix ciyaarood oo uu u saftay kooxdiisa, waxaana ku jiray saddexlay uu markii ugu horreysay taariikhdiisa ka dhaliyey Premeir League.
Waxa goolashan uu dhaliyey ayaa kooxdiisa ka caawiyeen inay sare ugu soo dallacdo kaalinta 12aad iyagoo 10 dhibcood oo nadiif ah ka sarreeya kooxda ku jirta booska 18aad ee khadka cas.
Dominic Solanke ayaa waxa uu abaal-marinta xiddiga bisha December ku garaacay saddexda ciyaartoy ee Trent Alexander-Arnold oo Liverpool ah, Cole Palmer oo Chelsea ah iyo kabtanka Tottenham ee Son Heung-min.
Dhinaca kale, waxa tababarihii bisha December ee horyaalka Premier League ku guuleystay Unai Emery oo ah macallinka kooxda Aston Villa oo naadigiisu uu kaalinta labaad kaga jiro horyaalka Premier League.
Toddoba ciyaarood oo ay dheeleen bishii December, ayay Aston Villa guuleysatay afar ka mid ah, waxaana ku jirtay guushii weynayd ee ay ka gaadheen Manchester City.
