Tababaraha kooxda kubadda cagta Real Madrid ee Carlo Ancelotti ayaa soo saaray liiska xiddigaha uu kala hortegayo Bayern Munich oo Arbacada kusoo booqan doonta garoonka Santiago Bernabeu oo ay ku dagaallami doonaan lugta labaad ee semi-finalka Champions League.
Real Madrid ayaa ciyaartii hore ee ka dhacday garoonka Allianz Stadium, waxa ay barbarro 2-2 ah lasoo gashay Bayern Munich oo hoygeeda joogta, iyadoo labada gool uu u dhaliyey Vinicius Junior, halka Bayern Munich ay goolasha u saxeexeen Leroy Sane iyo Harry Kane.
Los Blancos ayaa waxa dib ugu soo noqday difaaca midig ee reer Spain ee Dani Carvajal oo lugtii hore ee Munich kaga maqnaa ganaax hal kulan ah oo sababteedu ahayd laba kaadh oo uu qaatay wareeggii siddeedda ee Manchester City ay rikoodheyaasha kaga adkaadeen.
Real Madrid ayaa waxa kale oo ay haysataa goolhaye Thibaut Courtois oo lugtii hore ee Munich kaydka ku jiray, balse kusoo bilowday ciyaartii horyaalka LaLiga ee Sabtidii ee Cadiz ay guusha kaga gaadheen Santiago Bernabeu.
Carlo Ancelotti oo saxaafadda la hadlay ayaa sii kala-saaray labada goolhaye ee Thibaut Courtois iyo Andriy Lunin oo midkooda kusoo bilaabanaya ay saxaafaddu ku weydiisay shirkii jaraa’id ee maanta. waxaana uu sheegay in Lunin uu kusoo bilaabanayo ciyaarta Munich, maadaama Courtois uu kasoo laabtay dhaawac muddo dheer uu u jiifay.
Halkan kaga bogo xiddigaha Real Madrid ee kulanka Bayern Munich
Goolhayeyaal: Thibaut Courtois, Andriy Lunin iyo Kepa Arrizabalaga.
Difaaca: Dani Carvajal, Eder Militão, Nacho Fernandez, Lucas Vázquez, Fran García, Antonio Rüdiger iyo Ferland Mendy.
Khadka Dhexe: Jude Bellingham, Toni Kroos, Luka Modrić, Eduardo Camavinga, Federico Valverde, Aurelien Tchouameni, Dani Ceballos iyo Arda Güler.
Weerarka: Vinicius Junior, Rodrygo Goes, Joselu Mato iyo Brahim Diaz.
