Horyaalka waddanka Ingiriiska ee Premier League ayaa shaaciyey waqtiga ay dhacayso ciyaarta adag ee Manchester Derby ee kooxaha isku magaalada ah ee Manchester United iyo Manchester City, taas oo hore uu muhmal ugu jiray waqtigeeda.
Premier League ayaa shaaciyey in ciyaartan loo muddeeyey maalin Axad ah oo ay taariikhdu tahay March 3, 2024 oo garoonka Manchester City ee Etihad Stadium ay waqti hore oo duhurnimo ah ciyaartoydu labada kooxood iska soo xaadirin doonaan.
Telefishanka Sky Sports oo ciyaartan baahin doona iyo Premier League, ayaa waxay isla qaateen in ciyaartan ay noqoto ‘Super Sunday’, isla markaana waqti hore oo ay saacaddu tahay 3.30pm waqtiga UK ay bilaabanto, taas oo Geeska Afrika ka noqon doonta 6.30pm.
Ciyaartii hore ee labadan kooxood ee horyaalka Premier League ee garoonka Old Trafford oo bilaabantay isla waqtigan oo kale, waxa 3-0 ku adkaatay Manchester City, halka ciyaartii ugu dambaysay ee Etihad Stadium oo ahayd xilli-ciyaareedkii hore ay City ku xasuuqday 6-2 Man United oo is-weyday, waxaana min saddex gool dhaliyey Erling Haaland iyo Phil Foden.
Kulankan ayaa noqon doona min ciyaarta ugu horreysa ee labada kooxood ee bisha March, laakiin United ayaa waxay kaddib waajihi doontaa Everton iyo Sheffield United oo kusoo booqan doona Old Trafford iyo Brentford oo ay marti u noqon doonaan, halka City ay waajihi doonto Liverpool iyo Brighton oo ay labada u tegi doonto iyo Arsenal oo kusoo booqan doonta Etihad Stadium.
