No.7 mise No.10? Kylian Mbappe Oo Shaaciyey Lambarka Uu Doonayo Inuu U Xidho Real Madrid

Weeraryahanka reer France ee Kylian Mbappe ayaa ku wargeliyey Real Madrid lambarka uu doonayo inuu u xidho marka uu u saxeexo heshiiska la sugayo ee uu sida xorta ah ugu wareegayo marka uu dhamaadka xilli-ciyaareedkan socda.

Real Madrid ayaa dhamaystirtay 90% heshiiska Kylian Mbappe oo isaguna u sheegay maamulka kooxdiisa in uu iskaga tegayo dhamaadka xilli ciyaareedkan socda, waxaana uu Santiago Bernabeu kula midoobi doonaa Vinicius Junior, Rodrygo Goes, Fede Valverde, Jude Bellingham iyo xiddigo kale oo mustaqbalka ay Real Madrid iska garab ciyaarsiin doonto.

Su’aal ayaa waxa ay ka taagan tahay lambarka uu xidhan doono Kylian Mbappe iyadoo No.7 oo uu hadda u xidho PSG ay Real Madrid ku wareejisay laacibka reer Brazil ee Vinicius Junior, halka No.10 uu muddo 7 sannadood ah xidhnaa Luka Modric oo sannadkii 2017 ka dhaxday James Rodriguez.