Xiddiga kooxda kubadda cagta Arsenal ee Bukayo Saka ayaa kala doortay horyaalka Premier League iyo tartanka Champions League midka uu jeclaan lahaa inay kooxdiisu ku guuleysato xilli-ciyaareedkan.
Arsenal ayaa xalay usoo gudubtay wareegga siddeedda Champions League iyaga oo sidoo kalena hoggaanka u haya horyaalka waddanka Ingiriiska ee Premier League oo ay toban ciyaarood ka hadhsan yihiin dhamaadkiisa.
Kooxda tababare Mikel Arteta ayaa rikoodheyaal 4-2 ah kaga takhalustay FC Porto oo marti ugu ahayd Emirates Stadium, waxaana guushan ku suntanaa goolhaye David Raya oo badbaadiyey laba rikoodhe.
Halyeygii Arsenal ee Thierry Henry ayaa markii ay ciyaartii xalay dhamaatay waxa uu waraystay Bukayo Saka oo uu weydiiyey midka uu jeclaan lahaa Champions League iyo Premier League in ay midkood ku guuleysato Arsenal xilli-ciyaareedkan.
Saka oo ka jawaabay su’aashan ayaa yidhi: “Woow, waxay ila tahay in aanad ii ogolayn in aan idhaahdo labadaba waanu ku wada guuleysanaynaa, laakiin haddiiba aad doonayso inaan mid doorto, waxa aan dooranayaa horyaalka Premier League.
Thierry Henry ayaa isla su’aashan oo kale weydiiyey goolhaye David Raya, waxaana uu goolhayaha reer Spain ku gaabsaday: “Anigu waxa aan doonayaa in aanu labadaba ku guuleysano.”
