Halyeyga Premier League ee Jamie Redknapp ayaa saadaaliyey kooxda ku guuleysanaysa horyaalka waddanka Ingiriiska ee Premier League, iyadoo haddana ay isku dheggen yihiin naadiyada Arsenal, Manchester City iyo Liverpool oo daqiiqad walba isbeddel ku samayn karaya miiska kala-sarraynta.
Jamie Redknapp oo ka hadlay aragtidiisa horyaalka Premier League kaddib guul 2-0 ah oo ay Arsenal Sabtidii ka gaadhay Wolves, ayaa waxa uu sheegay in wax kasta oo dhacaba ay Arsenal tahay kooxda ku guuleysanaysa horyaalka Premier League xilli-ciyaareedka dambe.
Jamie Redknapp oo ka hadlayey Sky Sports ayaa yidhi: “Waxay ila tahay in horyaalka xilli-ciyaareedka dambe ay ku guuleysan doonto Arsenal, wax kasta oo dhacaba. Waxay heleen awood, waxay sannad walba samaynayaan horumar, xagaagana waxay la saxeexan doonaan dhawr ciyaartoy oo sii wanaajin doona.”
Jamie Redknapp oo u muuqanaya in xilli-ciyaareedkan uu horyaalka u hibeeyey Manchester City ayaa yidhi: “Anigu ma fiirinayo waxa dhacaya xilli-ciyaareedkan oo ay wali Arsenal ugu cad-caddahay, balse waxay ila tahay in Man City ay qaadi doonto, hase yeeshee xilli-ciyaareedka soo socda waxa horyaalka iska leh Arsenal.”
