Jurgen Klopp ayaa durba bilaabay nolol cusub maalmo kaddib markii uu ka tegay Liveprool oo Axaddii si qiiro leh ugu sii sagootiday garoonka Anfield, halkaas oo uu kusoo afjaray muddo sagaal sannadood ah oo uu laylinayey kooxdan.
Sagootintii Axaddii usbuucii hore ee soo afjartay waqtigii Jurgen Klopp ee Liverpool, waxa ay dhacday iyagoo 2-0 kaga adkaaday Wolves oo labada goolna ay u dhaliyeen Alexis Mac Allister iyo Jarell Quansah, waxaana markii ay ciyaartu dhamaatay uu Klopp hadal qiiro leh oo uu u jeediyey taageereyaasha uu ku weydiistay inay garab istaagaan tababaraha beddelaya ee Arne Slot.
Maalmo kooban kaddib markii uu ka tegay Liverpool, Jurgen Klopp ayaa waxa uu durba bilowday nolol cusub waxaana uu u safray waddanka Spain oo lagu arkay isaga oo dalxiis iyo tamashle kula qaadanaya qoyskiisa.
Wargeyska Daily Mail ayaa soo bandhigay Jurgen Klopp oo ay la socoto xaaskiisa Ulla oo ku sugan jasiiradda Balearic Island, waxaana uu degay hotel nooca qaaliga ah ee loo yaqaano ‘Five-star-ka’, kaas oo magaciisa lagu sheegay Kimpton Aysla Hotel.
Waxa ay hotelkan deggenaan doonaan inta uu ka dhamaanayo dhismaha guri qasri ah oo ay isaga iyo xaaskiisa ay 20ka sannadood is-qabeen ee Ulla ay degi doonaan oo ay ku baxayso lacag dhan £3.4 milyan oo Gini.
