Halyeeyga Arsenal, Ian Wright, ayaa su’aal geliyay go’aankii Chelsea ay ku iibisay weeraryahanka reer Senegal ee Nicolas Jackson, kaddib markii uu qaab ciyaareed wanaagsan ku billaabay waayihiisa Aston Villa.
Jackson ayaa dhaliyay toddobo gool 11 kulan oo uu u saftay Aston Villa, tan iyo markii uu xagaagii kaga soo biiray Chelsea heshiis ku kacay 65 milyan oo gini.
Weeraryahanka ayaa dib ula midoobay tababarihiisii hore ee Villarreal, Unai Emery.
Wright oo barnaamijka The Overlap ka hadlay ayaa sheegay inuu aad ugu faraxsan yahay horumarka Jackson.
“Waan ku faraxsanahay isaga. Markii aan Chelsea ku daawanaynay, wuxuu lumin jiray fursado, balse waxyaabo badan oo kale oo ciyaartiisa ka mid ah way fiicnaayeen. Qaabka uu orodka u sameeyo, difaacyada gadaashooda uga dhaqaaqo iyo taabashada kubadda ayaa muujinayay tayadiisa.
“Waxaad ognahay in haddii uu bilaabo inuu goolal dhaliyo uu wax walba hagaajin doono. Hadda marka aad daawato, waxaad arkaysaa kalsoonida ku soo korortay. Wuxuu Aston Villa ka sameyn karaa horumar la taaban karo, waxaana hadda isaga u cad inuu ka dhabeeyo hadafkiisa” ayuu yiri Wright.
Gary Neville ayaa sidoo kale ammaanay weeraryahanka, isagoo isweydiiyay inuu yahay ciyaaryahanka ugu horumarka badan Premier League.
“Waxaan mar walba aaminsanaa inuu koox u noqon doono saxiix wanaagsan, sababtoo ah waa weeraryahan dhib badan abuura. Anigu ma jeclaan lahayn inaan ka hor imaado. Waan ka helaa,” ayuu yiri Neville.
