Gareth Bale oo fariin u diray Kylian Mbappe kadib bandhig xun oo uu ka sameeyay kulankii Liverpool.
Gareth Bale ayaa ku adkeystay in Kylian Mbappe uu weli yahay ciyaaryahanka ugu fiican adduunka inkastoo uu bandhig liita ka sameeyay kulankii ay Liverpool 2-0 uga adkaatay Real Madrid habeenkii Arbacada kulan ka tirsan tartanka Champions League.
Xiddiga xulka France ee ku guuleystay Koobka Adduunka ayaa xusuusta u gashay habeen madow oo uu ku qaatay garoonka Anfield, halkaas oo uu ciyaar liidata kusoo bandhigay, kaddib rigoodhihii uu qasaariyay qeybtii labaad ee ciyaarta.
Mbappe ayaa haatan hal gool oo kaliya dhaliyay lixdiisii kulan ee ugu dambeysay ee uu u saftay Madrid, laakiin Bale ayaa aaminsan in 25-jirkan uu si fiican ugu muuqan doono kooxda uu hoggaamiyo Carlo Ancelotti.
Bale ayaa u sheegay TNT Sports:
“Waa wax dhaca, aniguba waxaan hore u lumiyay rikoodheyaal, qof kastaa wuu lumiyay rikoodheyaal.”
“Si uun ayay nasiib darro u tahay in waqti xaadirkan wax walba aysan u socon Mbappe siduu u rabo.”
“Waxaan aaminsanahay in uu yahay ciyaaryahanka ugu fiican adduunka, waxaanan qabaa inay tahay arrin waqti uun ah kahor inta uusan dib u fiicnaan.”
