Xiddiga Barcelona, Fermín López, ayaa la sheegay inuusan doonayn inuu ku biiro Manchester United waqtigan, inkastoo kooxdu ay xiiseynayso saxiixiisa.
López ayaa markii ugu horreysay lala xiriiriyay Manchester United Jimcihii 30-ka Oktoobar. Wariye Matteo Moretto ayaa sheegay in United ay wax ka weydiisay xaaladdiisa iyo sidoo kale Pablo Barrios oo ka tirsan Atletico Madrid.
Waxaa la sheegay in López uu noqon karo beddelka Bruno Fernandes, kaasoo qandaraaskiisu dhammaanayo dhammaadka xilli ciyaareedkan. Si kastaba, xiriirrada labada dhinac weli waxay ku ekaayeen xog-raadis, mana jirin wadaxaajood heshiis oo rasmi ah.
Barcelona ayaa lagu soo warramayaa inay ku qiimeyso ciyaaryahanka 84 milyan oo gini. López oo 23 jir ah ayaa 148 kulan u saftay kooxda, isagoo dhaliyay 37 gool, sidoo kalena sameeyay 32 caawin. Qandaraaskiisu Camp Nou wuxuu ku eg yahay 2031.
Wariye Fabrizio Romano ayaa sheegay in Barcelona aysan diyaar u ahayn inay iibiso ciyaaryahanka, isla markaana López uu ku faraxsan yahay inuu sii joogo kooxda.
“Fermín waa ciyaaryahan muhiim u ah Barcelona hadda iyo mustaqbalka. Isaga laftiisu aad ayuu ugu faraxsan yahay kooxda, mana jiro qorshe uu ugu wareegayo Premier League. Wuxuu boqolkiiba 100 sii joogayaa Barcelona,” ayuu yiri Romano.
Dhanka kale, Manchester United ayaa weli dooneysa weeraryahan cusub bisha Janaayo, maadaama Benjamin Šeško uu dhaawac kaga maqan yahay kooxda.
Dominic Calvert-Lewin, Nicolò Tresoldi, Jean-Philippe Mateta, Igor Matanović iyo Dion Beljo ayaa ka mid ah weeraryahannada lala xiriiriyay United.
