Kooxda kubadda cagta Chelsea ayaa xulatay saddex tababare oo midkood ay ku beddelayso Mauricio Pochettino oo ay taageereyaasha kooxdu ku cadaadinayaan Todd Boehly iyo maamulka sare ee naadiga ay in ay shaqada ka caydhiyaan.
Chelsea oo kaalinta 11aad kaga jirta horyaalka Premier League xilli-ciyaareedkii labaad oo xidhiidh ah ayay taageereyaashu ku ooriyeen tababare Pochettino markii ay Arsenal 5-0 ku xasuuqday kooxdooda horraantii toddobaadkan.
Blues ayaa sida muuqata ka maqnaan doonta tartamada Yurub xilli-ciyaareedka dambe, waxaana sida uu qoray wargeyska The Times ay maamulka Chelsea qiimayn ku samayn doonaan Pochettino marka ay kooxdu ciyaarto shanta kulan ee uga hadhay horyaalka.
Saddex tababare ayaa haddaba magacyadoodu ay miiska saaran yihiin, sida ay warbaahinta Ingiriisku ku warramayso, waxaana kaalinta koowaad ku jira Ruben Amorim oo ah tababaraha kooxda Sporting Lisbon oo hore loola xidhiidhinayey Liverpool laakiin toddobaadkii hore u safray magaalada London oo uu wada-hadallo kula yeeshay West Ham.
Tababaraha labaad waa Roberto De Zerbi oo ah macallinka Brighton & Hove Albion oo ay si weyn u doonayso Bayern Munich iyo tababarihii hore ee Bayern Munich ee Hansi Flick oo waqtigii uu joogay Bavaria ku guuleystay tartanka Champions League.
