Bruno Fernandes ayaa amaanay kabtanka xulka Portugal ee Cristiano Ronaldo ka dib markii uu muujiyay ‘saameyntiisa’ kursiga keydka guushii wacneyd ee ay ka gaareen Scotland.
Ciyaaryahanka Al-Nassr ayaa kursiga keydka laga soo kiciyay qeybtii labaad ee ciyaarta, xilli uu Bruno Fernandes dhaliyay goolka barbaraha, Ronaldo ayaa ahaa midkii ciyaarta ka dhaliyay goolka guusha, iyadoo ay ka harsan tahay daqiiqado yar, taasoo amaan uga timid saaxiibkiisii hore ee Manchester United.
Isagoo hadlayay ciyaarta ka dib, Fernandes ayaa yiri:
“Saameyntu mar walba waa isku mid, iyadoo aan loo eegin inuu ku soo bilowday kursiga iyo haddii kale.
Qof kasta oo soo galay wuxuu sameeyay isbeddel.
Cristiano waxa uu dhaliyay goolkiisii 901-aad, haddana waxa uu ku socdaa kun, taas oo ah waxa uu doonayo.”
Fernandes wuxuu iftiimiyay xaqiiqda ah in Ronaldo uu haatan ku socdo 1000 gool, inkasta oo da’diisu ay tahay 39 jir.
Ronaldo ayaa saameyn weyn ku yeeshay ciyaartii Scotland markii uu soo galay, waxaana uu mar kale muujiyay inuu weli noqon karo farqiga u horseedaya dalkiisa, isagoo sidoo kale dhaliyay goolkii guusha ee Portugal ay ka gaareen Croatia ciyaartii ugu horeysay ee Nations League khamiisti isagoo soo dhaliyay 900.
Isbuuc cusub oo uu la qaatay Portugal, Ronaldo ayaa haatan ku laaban doona Saudi Arabia iyadoo Al-Nassr ay raadineyso inay gaarto guusheedii labaad oo xiriir ah horyaalka Saudi Pro League.
Waxa ay wajihi doonaan Al-Ahli marka fasaxa xulalka uu dhamaado, waxaana laga yaabaa in Ronaldo uu ka hor yimaado saxiixa cusub ee Ivan Toney.
