Tababaraha reer Netherlands ee Arne Slot ee la filayo in usbuucyada soo socda loo magacaabo Liverpool ayaa ka dalbaday Reds in ay la saxeexato ciyaartoy bartilmaameed u ah Manchester City oo uu si weyn u doonayo tababare Pep Guardiola.
Laacibkan oo qandaraaska kooxdiisa lagu burburin karayo £51.4 milyan oo Gini, ayaa waxa la sheegay in Arne Slot uu doonayo inuu noqdo saxeexa koowaad ee ay hadiyadda uga dhigayso kooxdiisa cusub ee Liveprool.
Slot oo beddelaya Jurgen Klopp oo muddo sagaal sannadood ah laylinayey Liverpool, ayaa waxa la sheegay in uu dalbadatay weeraryahanka reer Spain ee Dani Olmo oo lala xidhiidhinayo Man City, kaas oo qandaraaskiisa RB Leipzig lagu burburin karayo £51.4 milyan oo Gini.
26 jirkan oo ka ciyaara weerarka dhexe, khadka dhexe iyo labada garab intaba, ayaa sida uu qoray wargeyska Nacional waxa uu Arne Slot magaciisa u gudbiyey maamulka Liverpool ee uu wada-hadalku u socdo.
Laacibkan oo sidoo kale ay doonayso Barcelona ayaa xagaagii hore ay Liverpool isku dayday inay la saxeexato, ka hor intii aanay uga leexanin Dominik Szobozlai, laakiin RB Leipzig ayaa diidday inay tanaasul ka samayso lacagta lagu burburin karayey qandaraaskiisa oo ahayd £60 milyan oo Gini, taas oo hadda hoos ugu soo dhacday £51.4 milyan oo Gini.
