Reds ayaa aad u daneenaya Gordon, kaasoo xirfadiisa dhalinyaranimo ka soo bilaabay Anfield ka hor inta uusan ku biirin akadeemiyada Everton isagoo 11 jir ah.
Gordon waxa uu u saftay 78 kulan oo heersare ah lix sano oo uu la joogay Toffees, ka hor inta uusan dhameystirin 45 milyan ginni oo uu ugu wareegay Newcastle bishii Janaayo 2023, tan iyo markaas wuxuu noqday xiddig hogaamiya kooxda tababare Eddie Howe.
Xiddiga garabka ka ciyaara ayaa dhaliyay 12 gool waxaana uu caawiyay 11 gool 48 kulan oo uu saftay xilli ciyaareedkiisii ugu horeeyay ee Magpies xilli ciyaareedkii 2023-24 ka dibna waxaa loo magacaabay xiddiga sanadka ee kooxda.
Gordon ayaa hadda ku maqan ciyaaraha caalamiga ah ee England ee Euro 2024, laakiin wararka la isla dhexmarayo ee ku saabsan mustaqbalka naadigiisa ayaa soo shaac baxay toddobaadyadii u dambeeyay.
Warbixin dhawaan soo baxday ayaa lagu sheegay in Newcastle ay diyaar u tahay inay Gordon ka iibiso Liverpool , waxayna soo jeedisay heshiis ciyaartoy iyo lacag isku bedelasho ah oo uu ku lug leeyahay daafaca Reds Jarell Quansah.
Reds ayaa ka cago jiiday inay aqbalaan soo jeedinta Newcastle maadaama aysan dooneynin inay arkaan 21 jirka Quansah ay siiyan iyaga.
Wadahadaladii u dhaxeeyay labada kooxood ayaa markii dambe burburay, laakiin waxay u muuqdaan kuwo dib loo soo nooleeyay, iyadoo hadda Liverpool ay diyaar u tahay inay soo gudbiso dalab 50 milyan ginni ah oo ay sidoo kale ku jiro goolhaye Caoimhin Kelleher oo kaydka u ah si uu u macaaneeyo heshiiska.
Reds ayaa la sheegay inay ku qiimeeyaan Kelleher inta u dhaxaysa £25m iyo £35m, taasoo la micno ah in wadarta qiimaha soo jeedintooda Gordon uu ku kacayo inta u dhaxaysa £75m iyo £85m.
Kelleher ayaa si weyn loo filayaa inuu raadsado daaq cusub xagaagan si uu u raadiyo fursado joogto ah isagoo sannado badan ku qaatay inuu keeyd ugu jiro goolhayaha kowaad ee Alisson Becker.
U diyaar garowga Newcastle inay iibiso Gordon ayaa waxaa sabab u ah xaalada dhaqaale xumo ee kooxda oo cadaadis ku saartay inay dhaqaale abuurto oo ay iibiso si ay uga fogaato inay jabiso sharciga Faa’iidada iyo Joogteynta Premier League.
Newcastle ayaa jeclaan lahayd inay sii haysato Gordon, waxaana la sugaya inay ka jawaabto dalabka cusub ee Liverpool oo uu ku jiro Kelleher.
Dhankiisa Gordon ayaa la rumeysan yahay inuu ku faraxsan yahay Newcastle, waxaana weli labo sano uga harsan tahay qandaraaskiisa St James’ Park.
Balse Newcastle qasab ayee ku tahay inay iibiyan xiddigan si aysan dhibco u waayin xagaaga soo socda.
