Aabaha dhalay xiddiga reer France ee Kylian Mbappe ayaa telefoonka kula hadlay madaxweynaha kooxda kubadda cagta Real Madrid kaddib markii ay kooxda reer Spain waqti dambe guul ka gaadhay Bayern Munich oo ay usoo gudubtay finalka Champions League.
Wilfried Mbappe oo dhalay Kylian Mbappe ayaa Florentino Perez ugu hambalyeeyey guusha ay gaadhay Real Madrid ee ay ugu gudubtay finalka Champions League, waxaanu sidoo kale u muujiyey niyad-samaan, halka uu dhinaca kalena u xaqiijiyey in dhowaan ay ka mid noqon doonaan bahda Real Madrid.
Wargeyska Defensa Central ayaa sheegay, in Wilfried Mbappe uu ku yidhi Perez ereyo ay ka mid ahaayeen: “Guriga ayaanu ka daawanay ciyaarta, waxaanay ahayd mid layaableh, waxa aanu rajaynaynaa in aannu halkaas iman doono.”
Hadalka kasoo yeedhay Wilfried Mbappe ayaa lagu tilmaamay inuu ka dhigan yahay damaanad ah in wiilkiisa Kylian Mbappe iyo isaguba ay dhowaan ka mid noqon doonaan bahda Real Madrid, waxaana sidoo kale loo fasiray inay tegi doonaan finalka Champions League ee ka dhici doona garoonka Wembley Stadium ee ay Real Madrid iyo Borussia Dortmund ku kala calaf-qaadi doonaan 1da June.
