Zinedine Zidane ayaa lala xiriirinayaa shaqada tababarenimo ee Juventus, laakiin waxay u badan tahay in Roberto Mancini ama Igor Tudor ay noqdaan kuwa bedelaya Thiago Motta.
Motta ayaa wajahaya cadaadis xooggan kadib markii uu si xun ku bilowday shaqadiisa Juventus. Xilli ciyaareedkiisii ugu horreeyay, kooxda ayaa laga reebay Coppa Italia iyo Champions League, sidoo kalena waxay halis ugu jirtaa inay seegto boosaska sare ee Serie A. Haatan, Bianconeri waxay ku jirtaa kaalinta shanaad ee kala sarreynta horyaalka, waxaana kulankooda soo socda ee ay la ciyaarayaan Genoa uu noqon karaa midka go’aaminaya mustaqbalka Motta, haddii natiijo wanaagsan la waayo.
Iyadoo mustaqbalkiisa uu mugdi ku jiro, warbixino kala duwan ayaa sheegaya in Juventus ay dooneyso inay lasoo saxiixato halyeeygii Real Madrid, Zinedine Zidane. Si kastaba ha ahaatee, wargeyska La Gazzetta dello Sport ayaa shaaca ka qaaday in bedelka dhabta ah ee Motta ay yihiin Roberto Mancini, tababarihii hore ee xulka Italy, ama Igor Tudor, oo hore ugu soo ciyaaray Juventus. Warbixintu waxay sidoo kale xustay in Zidane uu yahay musharraxa riyada kooxda, balse fursaddiisa haatan aad ayey u yartahay.
Dhinaca kale, Zidane ayaa sidoo kale lala xiriirinayaa xulka qaranka France, iyada oo la filayo inuu qabto shaqada tababarenimo kadib Koobka Adduunka 2026 ee ka dhacaya Waqooyiga Ameerika. Didier Deschamps ayaa la filayaa inuu xulka ka tago marka uu dhamaado heshiiskiisa haatan, taasoo fursad u abuuri karta Zidane.
Zidane ayaan wax koox ah maamulin tan iyo markii uu markii labaad ka tagay Real Madrid sanadkii 2021, taasoo ka dhigan in Juventus ay dagaal adag kala kulmi doonto haddii ay isku daydo inay la saxiixato.
