Xiriirka Kubadda Cagta Argentina (AFA) ayaa la sheegay inuu qorsheynayo in uu soo bandhigo Koobkii Adduunka ay Argentine qaaday 2022, xilliga ay xulalka Argentina iyo Brazil soo galayaan garoonka Mâs Monumental. Tallaabadan ayaa loo arkaa inay tahay jawaab celin toos ah oo ku wajahan ciyaartoyda Brazil, gaar ahaan Raphinha, oo horey u muujiyay hadallo xanaf leh ka hor ciyaarta.
Go’aankan ayaa la rumeysan yahay inuu yahay xeelad lagu xoojinayo niyadda xulka Argentina iyo taageerayaashooda, isla markaana lagu xasuusinayo guushii weynayd ee ay gaareen Koobka Adduunka ee Qatar. Xifaaltanka u dhexeeya Argentina iyo Brazil ayaa ah mid ka mid ah kuwa ugu adag kubadda cagta caalamka, iyadoo labada xul ay leeyihiin taariikh dheer oo guulo iyo tartan adag leh.
Xulka Argentina ayaa ku guuleystay Koobka Adduunka 2022 kadib markii ay ciyaar xiiso leh oo ay la yeesheen xulka Faransiiska ku adkaadeen rigoorayaal 4-2, kadib markii waqtigii caadiga ahaa iyo kan dheeraadka ah lagu kala baxay 3-3. Lionel Messi iyo Angel Di Maria ayaa dhaliyay goolasha Argentina, halka Kylian Mbappe uu u dhaliyay Faransiiska saddexley (hat-trick). Guushan ayaa aheyd tii ugu horreysay ee Argentina tan iyo 1986, markaasoo uu hogaaminayay Diego Maradona.
Ciyaarta soo socota ee ka dhici doonta garoonka Mâs Monumental ayaa la filayaa inay noqoto mid xiiso badan, iyadoo labada xul ay isku dayayaan inay muujiyaan awoodooda. Bandhigga muuqaalka guusha Koobka Adduunka ee Argentina ayaa lagu micneeyay inuu yahay xeelad maskaxeed oo lagu doonayo in lagu saameeyo xulka Brazil ka hor bilaabashada ciyaarta.
Taageerayaasha kubadda cagta ayaa si weyn u sugaya kulankan, iyagoo rajeynaya in ay markale arkaan xifaaltanka adag ee u dhexeeya labada xul ee ugu awoodda badan Koonfurta Ameerika.
