Mid kamid ah xiddigaha Arsenal oo la filayo inuu ka tago kooxda kaddib markii madaxda kooxda go’aansadeen inaan loo cusbooneysiin qandaraaskiisa.
Kieran Tierney ayaa lagu soo waramayaa inuu ka tagayo Arsenal kaddib lix sano oo uu ku sugnaa kooxda, taasoo sababtay go’aanka madaxda kooxda ee ah in aan qandaraas cusub loo fidin.
Ciyaaryahanka reer Scotland ayaa ku biiray Gunners sanadkii 2019 isagoo uga yimid Celtic, halkaasoo uu kasoo baxay akadeemiyada kooxda uu caruurnimada taageeri jiray.
Daafacan bidix ayaa si fiican ula qabsaday Emirates, isagoo 27 kulan ka ciyaaray Premier League xilli ciyaareedkii 2020-21, 22 kulan xilli ciyaareedkii 2021-22, iyo 27 kulan xilli ciyaareedkii xigay.
Si kastaba ha ahaatee, xilli ciyaareedkii hore ayaa amaah loogu diray Real Sociedad iyadoo Mikel Arteta uu raadinayay inuu kor u qaado kooxdiisa, taasoo keentay inuu doorbido ciyaartoyda sida Oleksandr Zinchenko iyo Jakub Kiwior.
Xilli ciyaareedkan, Tierney waxa uu la dhibtoonayay dhaawac muruqa ah oo ka soo gaaray kulankiisii furitaanka ee isreeb-reebka Euro 2024 ee dalkiisa. Wuxuu dib ugu soo laabtay kursiga keydka bishii hore, xitaa wuxuu ku bilowday kulankii EFL Cup-ka ee ay guusha ka gaareen Crystal Palace, laakiin mar kale dhaawac ayaa soo gaaray.
Haatan, bixitaanka Tierney ayaa u muuqda mid soo dhow, iyadoo madaxda Arsenal ay diideen inay qandaraaskiisa ku kordhiyaan hal sano oo dheeraad ah, sida uu sheegay saxafi David Ornstein oo ka tirsan The Athletic.
27-jirkaan qandaraaskiisu wuxuu dhacayaa bisha Juun, waxaana waqtiga loogu dari lahaa hal sano oo kale.
Tani waxay ka dhigeysaa Tierney mid xor ah inuu bisha Janaayo la xaajoodo kooxaha dibadda, iyadoo suuragal tahay inuu isla markiiba u wareego koox cusub.
Waxaa jira kooxo Ingiriis ah oo xiiseynaya, sidoo kale waxaa laga yaabaa inuu dib ugu laabto Celtic, halkaasoo uu kasoo hayaamay xilligii hore. Sidoo kale, waayihiisa Spain ayaa la rumeysan yahay inay fursado cusub ka abuurtay halkaas.
