Tababaraha Chelsea, Enzo Maresca, ayaa ka saaray Ben Chilwell iyo Cesare Casadei liiska ciyaartoyda kooxdiisa ee kulanka ay la ciyaarayaan Morecambe wareega saddexaad ee FA Cup-ka toddobaadkan.
Isagoo la hadlayay saxaafadda Jimcaha, Maresca ayaa qirtay inuusan rabin in ciyaartoydaasi ay dhaawacmaan, taas oo carqaladayn karta bixitaankooda Stamford Bridge.
“Chilwell, waxaan u maleynayaa inuu hadda ka fikirayo inuu baxayo, sidaas darteed waxaa wanaagsan inaanan isticmaalin si looga fogaado xaalad kasta, dhaawac, ama waxyaabaha noocaas ah.
“Casadei waa mid la mid ah. Xilligan, qorshuhu waa inaanan siin daqiiqado ciyaar ah si loo siiyo fursad uu ugu dhaqaaqo inuu meel kale ka ciyaaro,”ayuu yiri Maresca.
Chilwell ayaa u saftay 107 kulan kooxda Blues tan iyo markii uu kaga soo biiray Leicester City sanadkii 2020.
Si kastaba ha ahaatee, Maresca ayaa inyar adeegsaday daafaca 27-jirka ah xilli ciyaareedkan, waxaana la filayaa inuu baxo si uu u helo waqti badan oo ciyaar ah.
Dhanka kale, Casadei ayaa xiiso ka helaya kooxaha Feyenoord iyo Monza. Ciyaaryahanka khadka dhexe ee Talyaaniga ah ayaa sidoo kale doonaya inuu helo waqti badan oo uu ka ciyaaro safka koowaad, waxaana loo ogolaan doonaa inuu amaah ku baxo oo kaliya.
