Daaficii hore ee Manchester United, Raphael Varane, ayaa daaha ka rogay in Jose Mourinho uu ku tilmaamay mid ‘faa’iido daran’ xilligii ay ka wada tirsanaayeen Real Madrid.
Varane ayaa ku biiray Madrid xagaagii 2011, markaasoo uu Mourinho galayay xilli ciyaareedkiisii labaad ee Bernabeu, kadib markii uu xilli ciyaareedkiisii ugu horreeyay kula guuleystay Copa del Rey.
Daafaca reer France wuxuu ciyaaray 15 kulan xilli ciyaareedkiisii ugu horreeyay Madrid, isagoo ahaa daafaca saddexaad ee kooxda ka dib Pepe iyo Sergio Ramos.
Laakiin ka hor bilowga xilli ciyaareedkiisii labaad, Varane wuxuu sheegay in Mourinho uu siiyay farriin adag oo ku saabsan sida uu ugu dagaallami karo boos joogto ah oo kooxda koowaad ah.
“Markii aan imid, wuxuu igu yiri: ‘Hal shay oo kaliya ayaan kaa rabaa, maalin kasta, hal saac iyo bar, inaad dadaal walba bixiso. Inta kale ha walwalin, waad horumari doontaa, aniga ayaa kaa caawinaya, naso’,” ayuu Varane u sheegay The Bridge.
“Xilli ciyaareedkaygii ugu horreeyay, waxaan ciyaaray qiyaastii 15 kulan, laakiin waxay ahaayeen ciyaarihii aan horey ugu soo baxnay ama kuwa koobabka. Wuxuu iga dhigay mid tartiib tartiib ah u horumara, mana uusan i tuurin si degdeg ah.”
“Xilli ciyaareedkii koowaad wuu fiicnaa, laakiin waxaa la iga filayay wax intaa ka badan. Markaas ayaan isku dayay inaan xad dhaaf u ciyaaro, taasoo igu adkaatay, waliba si fiican uma dareemaynin.”
Varane ayaa xusay in Mourinho uu si lama filaan ah ugu yeeray xilli ciyaareedkii labaad, xilli kooxda aysan si wanaagsan ku bilaabanin.
“Waan xasuustaa si fiican, waxey aheyd xarunta jimicsiga, markaasuu i wacay.”
“Waa qof aan aad u ixtiraamo, waa nin leh haybad, wuxuuna iigu sheegay si toos ah… ‘laakiin maxaad faa’iido darro u tahay?’”
“Waxaan u fiiriyay si la yaab leh [naxdin], sababtoo ah runtii wuxuu ii geystay duritaan xooggan. Waan fiiriyay kadibna waxaan iri ma sahlana sababtoo ah ma ciyaarayo, xilli ciyaareedkana si adag ayuu ku bilowday.”
“Waan dhibsaday markaas, kadibna wuxuu i weydiiyay haddii aan diyaar u ahay inaan ciyaaro Arbacada xigta.”
Varane, oo Madrid kula guuleystay 18 koob 10 sano oo uu joogay, kahor inta uusan ku biirin Manchester United £42 milyan xagaagii 2021, wuxuu sheegay in haddii uu ku guuldareysan lahaa inuu horumar sameeyo isagoo ka hoos ciyaaraya Mourinho, xirfaddiisa Bernabeu ay halis gali lahayd.
“Waxay ahayd khiyaano yar, waxaan iri ‘haa’ inkastoo aanan diyaar ahayn,” ayuu raaciyay.
