Xiddiga khadka dhexe ee Real Madrid, Jude Bellingham, ayaa magacaabay Rodrygo inuu yahay ciyaaryahanka ugu kartida badan uguna dhayalsiga badan safka Los Blancos.
Bellingham, oo ka hadlayay guushii ay Real Madrid ka gaartay Manchester City kulankii lugta labaad ee isreebreebka Champions League, ayaa sheegay in Rodrygo yahay xiddiga ugu badan ee naftiisa u hura kooxda.
Markii la weydiiyay sida uu u qiimeeyo Kylian Mbappé iyo Rodrygo, Bellingham wuxuu u sheegay CBS Sports:
“Kylian waa ciyaaryahan aan caadi ahayn. Qof walba wuu ogyahay sida uu u yahay.waa xiddig khaas ah.”
Intaas wuxuu ku daray:
“Rodrygo si weyn ayaa loo dhayalsadaa. Aniga ahaan, wuxuu noqon karaa ciyaaryahanka ugu hibada badan safka. Waxyaabaha uu kubadda ku sameeyo waa wax cajiib ah.”
Bellingham ayaa sidoo kale xusay sida uu Rodrygo ugu dulqaato inuu ka ciyaaro boos aan ahayn midka uu jecel yahay, isagoo yiri:
“Sharaf ayay ii tahay inaan la ciyaaro labadoodaba. Waxay naga caawiyaan guulaha. Hal arrin oo muhiim ah oo ku saabsan Rodrygo waa inuu yahay ciyaaryahanka ugu badan ee naftiisa u hura kooxda.”
“Booska uu doorbido waa garabka bidix, laakiin marar badan wuu aqbalaa inuu difaac ka caawiyo dhanka midig. Weligii cabasho ma muujiyo, wuxuuna si daacad ah ugu shaqeeyaa kooxda.”
Rodrygo ayaa ka mid ah xiddigaha muhiimka u ah Real Madrid tan iyo markii uu ku soo biiray kooxda sanadkii 2019, isagoo u saftay in ka badan 250 kulan.
