Halyeygii Arsenal Ian Wright ayaa ku eedeeyay Chelsea inay gashay qalad weyn markii ay ka gaabiyeen inay lasoo saxiixdaan goolhayihii hore ee Gunners, Aaron Ramsdale, kaas oo uu aaminsan yahay inuu beddel wanaagsan u noqon lahaa Robert Sanchez.
Ramsdale ayaa ku raaxaystay laba xilli ciyaareed oo guulo leh intii uu joogay Arsenal, balse ugu dambeyntii booskiisa koowaad ayuu waayay ka dib imaatinka David Raya oo kaga soo biiray Brentford xagaagii 2023.
Xagaagan, 26-jirka reer England ayaa u dhaqaaqay Southampton isagoo raadinaya fursad uu kusii ilaashado booskiisa xulka qaranka. Si kastaba ha ahaatee, Wright ayaa sheegay in Chelsea ay lumisay fursad weyn oo ay Ramsdale ku keeni lahayd Stamford Bridge si loo xoojiyo goolka.
“Chelsea way fiicantahay, laakiin difaac ahaan waa inay is adkeeyaan,” ayuu Wright yiri.
Isagoo la hadlayay warbaahinta, halyeyga Arsenal ayaa sheegay in Chelsea ay u baahneyd goolhaye tayo leh si loo xalliyo dhibaatooyinka difaaca ee kooxda. “Wax walba waxay muujinayaan inay hoos u dhac ku socoto goolhayaha. Ramsdale wuxuu noqon lahaa mid ku habboon iyaga,” ayuu yiri Wright.
Waxa uu sidoo kale tilmaamay inay jiraan ciyaartoy kooxda ka dhex muuqanaya, sida Cole Palmer oo bandhigyo wanaagsan sameynaya, laakiin hoos u dhaca difaaca iyo goolhayuhu ay tahay caqabadda ugu weyn ee haysata Blues.
