Virgil van Dijk ayaa weli lagu tiriyaa inuu yahay daafaca ugu fiican Premier League, sida uu qabo halyeyga Everton iyo Bolton, Alan Stubbs.
Van Dijk oo 33 sano jir ah ayaa daafaca dhexe u ciyaara Liverpool tan iyo 2018, waxaana uu kasoo ciyaarayay horyaalka Ingiriiska tan iyo markii uu ku biiray Southampton sanadkii 2015.
Xiddiga reer Netherlands inkasta oo uu kaliya hal jeer ku guuleystay horyaalka, haddana waxaa mar walba loo arkaa mid ka mid ah daafacyada ugu fiican. Stubbs ayaa aaminsan in Van dijk uu weli yahay kan ugu wanaagsan booskiisa.
“Virgil waa daafaca ugu fiican,” ayuu Stubbs yiri.
“Wuxuu leeyahay dhammaan tayada aad ugu baahan tahay daafac,xawaare, xoog, wuxuu si fiican u akhriyaa ciyaarta, waana hogaamiye.”
“Ma heysato hogaamiyeyaal badan kubadda cagta maanta, laakiin Virgil waa hogaamiye dhab ah, waana midka ugu wanaagsan ee kooxdiisa ku hogaamiya gudaha garoonka.”
“Wuxuu ku ciyaaraa kalsooni buuxda, waana ciyaaryahan heer caalami ah oo ixtiraam ka helay saaxiibadiis intii uu ciyaarayay.”
