Daafaca Liverpool, Virgil van Dijk, ayaa shaaca ka qaaday in Chelsea ay tahay mid ka mid ah kooxaha si dhab ah ugu tartamaya horyaalka Premier League xilli ciyaareedkan.
Chelsea, oo qaab ciyaareed wanaagsan ku jirta, ayaa badisay afartii kulan ee ugu dambeysay horyaalka, taasoo ka caawisay inay yareeyaan farqigii dhibcaha ee ay Liverpool kaga dambeeyeen.
Van Dijk, oo warbaahinta la hadlay, ayaa sheegay in kooxda uu tababare Enzo Maresca hoggaamiyo ay leeyihiin ciyaartoy tayo sare leh oo awood u leh inay horyaalka ku guuleystaan.
“Chelsea waxay u tartamayaan horyaalka Premier League, taas waa mid iska cad,” ayuu yiri Van Dijk. “Waxay haystaan ciyaartoy tayo leh, mana jiro farqi u dhexeeya xiddigaha safka hore iyo kuwa kaydka ka soo kaca.”
Van Dijk ayaa sidoo kale tilmaamay in kulamada soo socda ee Chelsea ay u muuqdaan kuwo aan culays badan lahayn, taasoo fursad u siin karta inay sii wadaan guulaha ay gaadhayaan.
“Waxaan qabaa inay u tartamayaan horyaalka Premier League si dhab ah,” ayuu hadalkiisa ku soo gabagabeeyay.
Liverpool iyo Chelsea ayaa labaduba tartan adag ugu jira hanashada horyaalka, iyadoo taageerayaasha labada kooxood ay si dhow ula socdaan xaaladda kooxahooda.
