Vinícius Júnior ayaa sheegay inuu aad ugu faraxsan yahay suurtagalnimada ah in Neymar uu ku soo laabto xulka Brazil si uu uga qeyb galo kulamada isreeb-reebka Koobka Adduunka ee soo socda oo ay la ciyaari doonaan Colombia iyo Argentina.
Brazil ayaa lagu wadaa inay ku dhawaaqdo liiska ciyaartoyda maalinta Khamiista, waxaana la filayaa in Neymar lagu soo daro.
Xiddiga 33-jirka ah ayaan u ciyaarin xulkiisa tan iyo ciyaartii isreeb-reebka Koobka Adduunka ee ay la yeesheen Uruguay bishii Oktoobar 2023, markaas oo uu soo gaaray dhaawac jilibka ah oo illowsiiyay garoomada muddo sanad ah.
“Rajadu waa mid weyn maxaa yeelay waa halyeeyga jiilkeenna,” ayuu yiri Vinícius oo la hadlayay TNT Brasil isagoo ka hadlaya Neymar.
Neymar ayaa dib ugu soo laabtay kooxdiisii carruurnimada ee Santos intii lagu jiray suuqa kala iibsiga ee Janaayo, isagoo doonaya inuu dib u helo qaab ciyaareedkiisii hore kaddib dhaawacyo xaddiday inuu safto keliya toddobo kulan muddo ku dhow 18 bilood oo uu joogay kooxda Al Hilal ee Sacuudiga.
Neymar ayaa sheegay inuu “ku soo laabanayo qaab ciyaareedkiisii ugu fiicnaa” kaddib markii uu dhaliyay gool kulankii ay 2-0 kaga badiyeen Bragantino Axaddii — waana goolkiisii saddexaad afartii kulan ee ugu dambeysay uu u saftay Santos.
“Waxaan aad ugu faraxsanahay inuu ku soo laabtay Santos,” ayuu yiri Vinícius. “Inuu dib ugu soo laabtay gooldhalinta oo uu faraxsan yahay, taas oo had iyo jeer ah tan ugu muhiimsan.”
