Weeraryahanka Sporting CP, Viktor Gyokeres, ayaa meesha ka saaray suurtagalnimada uu ugu biiri karo kooxda Nottingham Forest xagaagan, sida ay sheegayaan warbixino cusub.
Gyokeres, oo qaab ciyaareed cajiib ah soo bandhigay xilli-ciyaareedkan, ayaa 40 gool u dhaliyay Sporting CP 41 kulan oo tartamada oo dhan ah. Waxqabadkiisa ayaa sare u qaaday xiisaha ay kooxaha ugu waa weyn Yurub u qabaan saxiixiisa.
Premier League ayaa la filayaa in uu noqdo horyaalka uu xiddiga reer Sweden ka ciyaari doono xilli-ciyaareedka soo socda, waxaana jira kooxo dhowr ah oo doonaya saxiixiisa.
Sida laga soo xigtay warbixin uu qoray wariyaha Florian Plettenberg, Gyokeres ma doonayo inuu ku biiro Nottingham Forest, inkastoo la sheegay in kooxdaasi ay wadahadalo la furtay 26-jirkan.
Kooxaha Arsenal, Chelsea, Liverpool, Manchester City, Manchester United iyo Newcastle United ayaa si weyn u daneynaya weeraryahanka, balse wararka soo baxaya ayaa tilmaamaya in Arsenal, Liverpool iyo Manchester City ay yihiin kooxaha uu doorbidayo haddii uu Premier League kusoo laabto.
Gyokeres, oo horey uga ciyaaray England xilligii uu la joogay Coventry City, ayaa la filayaa inuu ka tago Sporting CP xagaagan, balse mustaqbalkiisa rasmiga ah weli lama xaqiijin.
