Daafaca Liverpool, Trent Alexander-Arnold, ayaa sheegay inuu ku nool yahay riyadiisa isagoo wali ka ciyaaraya Anfield, xilli ay socdaan warar sheegaya inuu u dhaqaaqi karo Real Madrid xagaaga soo socda.
Mustaqbalka xiddiga reer England ayaa weli aan la hubin, maadaama qandaraaskiisa Liverpool uu dhacayo dhammaadka xilli ciyaareedkan. Sida sharciga UEFA dhigayo, Alexander-Arnold wuxuu awoodi doonaa inuu heshiis horudhac ah la gaaro kooxaha dibadda England bisha Janaayo haddii uu go’aansado inuusan qandaraas cusub u saxiixin kooxda.
Real Madrid ayaa ah kooxda ugu cadcad saxiixa Alexander-Arnold haddii uu ka tago Liverpool, balse daafaca ayaa tilmaamay inuu ku qanacsan yahay noloshiisa haatan ee Anfield.
“Weligay uma malaynayn inaan ciyaaro kulamadan badan,” ayuu yiri Alexander-Arnold mar uu la hadlay bogga rasmiga ah ee Liverpool.
“Weligay kuma fikirin inaan ku guuleysan doono koobab badan ama aan gaari doono wixii aan sameeyay. Waxaan ku noolahay riyadeyda maalin kasta, laga soo bilaabo maalintii aan bilaabay inaan kubadda cagta ciyaaro ilaa maanta. Taasi waa xaqiiqada.”
Liverpool ayaa weli ku rajo weyn inay heshiis cusub ka saxiixato Alexander-Arnold si uu u sii wato waayihiisa ciyaareed ee Anfield.
