Tim Sherwood ayaa sheegay in saddex kooxood ay ‘carqaladeyn’ karaan rajada Arsenal ee ku guuleysiga horyaalka Premier League.
Liverpool ayaa haatan hoggaanka u heysa horyaalka iyagoo ku hoggaaminaya siddeed dhibcood, balse farqigaas wuxuu noqonayaa shan dhibcood haddii Arsenal guuleysato kulankeeda baaqiga ah.
Kooxda uu layliyo Arne Slot ayaa hal mar oo kaliya laga badiyay xilli ciyaareedkan horyaalka, balse waxay Arsenal siisay rajo ay uga fikiri karto hanashada horyaalka kadib markii ay dhibco lumiyeen laba kamid ah saddexdii kulan ee ugu dambeysay.
Liverpool ayaa barbaro 2-2 ah la gashay Aston Villa habeenkii Arbacada, ka hor inta aysan Everton dhalinin gool daqiiqadihii ugu dambeeyay kulankii Merseyside Derby horaantii bishan.
Dhanka kale, Arsenal waxay badisay saddexdii kulan ee ugu dambeysay, inkastoo imtixaano adag ay sugayaan, maadaama ay kooxda heysato kaliya saddex weeraryahan rasmi ah kadib dhaawacyadii halista ahaa ee Kai Havertz iyo Gabriel Jesus.
Sherwood iyo Danny Murphy labaduba waxay rumeysan yihiin in Arsenal ay wajihi doonto kulamo ka adag kuwa Liverpool, inkastoo hoggaamiyeyaasha horyaalka ay toddobaadkan u safri doonaan Manchester City.
‘Haddii aad si fiican u fiiriso, Liverpool waxay leedahay afar kulan oo garoonkooda ah lixda kulan ee soo socda, Anfield-na waa meel ay adag tahay in laga badiyo,’ Sherwood ayaa sidaas u sheegay Premier League Productions.
‘Waxaan doorbidi lahaa jadwalkooda. Arsenal waxay heysataa saddex kulan oo gurigeeda ah iyo saddex ay marti tahay. Labo kamid ah waxa ay u safreysaa Nottingham Forest iyo Manchester United.
‘Waxaa la dhihi karaa United waxay ahayd koox la garaaci karo waayadan dambe, balse waxay badanaa dagaal adag la galaan kooxaha waa weyn. Xusuuso, waxay Arsenal ka reebeen FA Cup-ka.
‘Waxaan u maleynayaa in inkastoo Liverpool ay la ciyaareyso Man City toddobaadkan, haddana jadwalkooda soo socda wuu ka fudud yahay kan Arsenal.’
